Lyon

Franskir slökkviliðsmenn reyna nú að ná illa förnu líki út úr loftræstikerfi banka í Lyon en ekki er vitað hvað varð manninum að aldurtila. Eins er ekki vitað hvað í ósköpunum hann var að gera í loftræstikerfi Credit Foncier bankans. Líklegast þykir að hann hafi ætlað að ræna bankann eða þá að um heimilislausan einstakling hafi verið að ræða sem leitaði í hlýjuna.

Starfsmenn Credit Foncier hafa allt frá því í september kvartað undan vondri lykt í útibúi bankans í Lyon og í gær þegar starfsmaður greip til sinna ráða og leit inn í loftræstikerfið sá hann líkið.

Hinn látni var fastur í beygju í loftræstistokk og vinna slökkviliðsmenn og sérfræðingar við að víkka opið, sem er einungis 50 cm, svo auðveldara sé að komast að líkinu og koma því í heilu lagi út úr loftræstikerfinu.