Búðarverð:6.400 pund Sambandsslitaverð: 3 þúsund pund. Af vefnum neverlikeditanyway.com/

Nýr vefur hefur verið settur í loftið þar sem fólk getur selt muni sem það hefur eignast í samböndum sem ekki entust.

Annabel Acton, 28 ára, frá New York, stofnaði vefinn neverlikeditanyway.com eftir að samband hennar og unnustans lauk einungis nokkrum dögum fyrir jól, samkvæmt frétt Daily Telegraph.

Acton átti meðal annars tvo farmiða til Lundúna, auk listmuna og skartgripa sem hún hafði engan áhuga á að eiga lengur. Hún ákvað því að selja þetta allt á Netinu. Fannst henni þetta betri leið heldur en að leita á náðir íssins og snýtuklútanna til að jafna sig á sambandsslitunum. 

Vefurinn hefur vakið töluverða athygli og er hægt að kaupa þar brúðarkjóla, trúlofunarhringa og giftingarhringa fyrir lítið fé.

Seljendur birta mynd af því sem er til sölu með verðmiða eins og eðlilegt er að greiða fyrir hlutinn út úr búð en síðan er útsöluverðið og oft texti sem fylgir með um sambandsslitin.