Stephen Slevin var í haldi í 22 mánuði, án dóms. mbl.is

Lögregluyfirvöld í Nýju Mexíkó handtóku mann vegna gruns um ölvunarakstur árið 2005 og gleymdu honum svo í einangrun án réttarhalda, í tvö ár. Manninum hafa nú verið dæmdar háar skaðabætur eða 22 milljónir dollara.

Stephen Slevin var handtekinn árið 2005 í Dona Ana-sýslu í Nýju Mexíkó í Bandaríkjunum.

Hann var kærður fyrir að aka stolnu ökutæki, aka undir áhrifum og með áfengi við hönd, án ökuréttinda.

En málið var aldrei tekið fyrir og það var ekki fyrr en í júní 2007, 22 mánuðum eftir handtökuna, að dómari komst að þeirri niðurstöðu að Slevin væri ekki hættulegur og honum sleppt úr haldi.

Í frétt Sky fréttastofunnar er haft eftir lögmanni Slevin að honum hafi verið varpað í fangelsi til þess að „rotna“.

Á meðan hann var í haldi var honum m.a. gert að rífa sjálfur úr sér skemmda tönn, þar sem honum var meinað að fara til tannlæknis.

Enginn getur haldið því fram að Slevin hafi alla tíð verið fyrirmyndarborgari en sakaskrá hans nemur 26 blaðsíðum, segir saksóknari sýslunnar sem ætlar að áfrýja niðurstöðu dómarans.