Kókaín í plastpookum. Úr safni. mbl.is/Reuters

Sextán kíló af kókaíni fundust í poka merktum Sameinuðu þjóðunum í höfuðstöðvum stofnunarinnar í New York. Efnin voru send þangað frá Mexíkó með DHL-hraðþjónustunni.

Í frétt Sky fréttastofunnar segir að fíkniefnin hafi að öllum líkindum verið í eigu mexíkóskra fíkniefnasala og fyrir mistök verið send í höfuðstöðvar SÞ.

Pokarnir sem voru eftirlíkingar af pokum SÞ, vöktu strax athygli við komuna í höfuðstöðvarnar. Á þeim var ekkert heimilisfang og ekkert nafn á sendanda. Pokarnir voru engu að síður sendir til SÞ af starfsmönnum DHL vegna þess að merki stofnunarinnar var prentað á þá.

Starfsmenn Sameinuðu þjóðanna njóta margir hverjir diplómatískra réttinda og innihald sérstakra sendingapoka stofnunarinnar ekki skoðað af yfirvöldum með sama hætti og annar póstur.

Starfsfólk SÞ var þó fljótt að átta sig á að eitthvað gruggugt væri á ferðinni og er pokarnir voru opnaðir komu í ljós bækur sem búið var að hola að innan og voru fullar af kókaíni.

„Einhver í Mexíkó er í miklum vandræðum núna,“ er haft eftir lögreglustjóranum sem fór með málið í New York.

SÞ hafa gefið út þá yfirlýsingu að enginn starfsmaður stofnunarinnar liggi undir grun um innflutning efnanna.