Dollari.

Eigandi veitingastaðarins Fat Smitty´s í Discovery Bay í Washington hefur látið um 10 þúsund dollara renna til góðgerðarmála en hver einasti dollaraseðill kom af vegg staðarins, þar sem þeir höfðu sumir hverjir hangið í 27 ár.

Hefðin komst á þegar farandsölumaður krotaði nafn sitt á dollaraseðil og festi hann síðan með teiknibólu á vegginn. Aðrir kúnnar veitingastaðarins fóru að apa þetta eftir og þegar eigandi staðarins, Carl „Fat Smitty“ Schmidt ákvað að láta peningana renna til góðgerðarmála, kom í ljós að seðlarnir voru orðnir alls 10.316 talsins.

Peningarnir munu renna til Camp Parsons-skátabúðanna og rannsóknarmiðstöðvarinnar á St. Jude´s barnaspítalanum í Memphis en eigandi veitingastaðarins vonar að þegar endurinnréttingum lýkur í lok mars muni viðskiptavinir hans hefja að festa dollaraseðla á vegginn á ný.