Scarlett Johansson. mbl.is/Cover Media

Scarlett Johansson er komin með nýjan upp á arminn. Sá heppni heitir Nate og er forstjóri auglýsingafyrirtækis en eftirnafnið er enn á huldu, að því er fram kemur á RadarOnline. Sást til skötuhjúanna í New York á dögunum þar sem þau gengu hönd í hönd um stræti borgarinnar, bæði með bros á vör.

Samkvæmt heimildarmanni RadarOnline er sambandið fremur nýtt og hafa bæði leikkonan og Nate gert sér far um að halda því leyndu. Nýi kærastinn er að sögn afar jarðbundinn og Johansson finnst mjög heillandi að hann er ekkert upptekinn af frægð hennar og sækist ekki eftir því að baða sig í sviðsljósinu.

Johansson skildi við Ryan Reynolds árið 2010 eftir tveggja ára hjónaband og átti á síðasta ári í stuttu ástarsambandi við Sean Penn.