Reuters

Forstjóri rútufyrirtækisins í Ástralíu kom starfsmönnum sínum ánægjulega á óvart með því að greiða þeim samtals um 15 milljónir ástralskra dala (um 1,9 milljarða kr.) í kaupauka. Forstjórinn vildi með þessu þakka þeim fyrir vel unnin störf. Starfsmennirnir eru orðlausir.

Ken Grenda, sem er 79 ára gamall, seldi fjölskyldufyrirtækið sem hefur verið starfrækt í 66 ár. Hann ákvað að láta stóran hluta söluandvirðisins renna í vasa starfsmannanna, sem hafa verið duglegir og hliðhollir.

Alls starfa um 1.800 manns hjá fyrirtækinu. Þegar þeir fóru yfir stöðuna í heimabankanum og sáu að búið var að leggja inn á þá mörg þúsund dali, þá töldu þeir að bankinn hlyti að hafa gert mistök.

Að meðaltali fékk hver og einn starfsmaður um 8.500 ástralska dali í sinn hlut, eða rúma eina milljón kr. Sumir fengu yfir 100.000 dali.

„Fyrirtæki getur aðeins verið eins gott og starfsmennirnir og okkar starfsfólk er frábært,“ segir forstjórinn rausnarlegi.