Drew Barrymore. MARIO ANZUONI

Nýjasta myndin sem Drew Barrymore leikur í heitir Big Miracle og var tekin upp í Alaska. Leikkonan segist sjálf sólarfíkill og reyndist það henni því að mörgu leyti erfitt að taka upp á svona köldum slóðum enda átti hún lítið af útivistarfötum.

„Ég bjó bókstaflega í útivistarbúðinni þegar ég kom til Alaska. Það hjálpaði klárlega,“ segir hún í samtali við USA Today og hlær.

Kuldinn hafði þó einnig öðruvísi áhrif á hana því hún upplifði óseðjandi hungur í Alaska og var því dugleg að fara út að borða með mótleikaranum John Krasinski og eiginkonu hans, Emily Blunt.

„Ég bætti klárlega á mig einhverjum fimm til átta pundum sem urðu hlífðarspik. Það sást bara ekki undir öllum þessum fatnaði,“ segir Drew. „Þegar ég kom heim til LA hugsaði ég: „Vá, ég tók greinilega hluta af Alaska með mér heim.“