Junrey Balawing sem er minnsti maður heims, hefur fengið keppinaut. mbl.is/reuters

Fulltrúar Heimsmetabókar Guinness ætla að fara til Nepal til að kanna hvort þar búi minnsti maður heims. 72 ára Nepali, Chandra Bahadur Dangi, segist 56 sentimetrar á hæð og vega 12 kíló.

„Við ætlum okkur að heimsækja Dangi til að mæla hæð hans,“ segir ritstjóri heimsmetabókarinnar, Craig Glenday.

Dangi var í viðtali í nepalska sjónvarpinu í gær og þar sást hann leika á als oddi og stökkva fimlega niður af bekk í almenningsgarði. Haft var eftir fjölskyldu Dangis að hann væri við góða heilsu.

Núverandi heimsmethafi er Junrey Balawing frá Filippseyjum. Hann er 59,93 sm á hæð. Hann hafði titilinn af öðrum Nepala, Khagendra Thapa Magar, sem er 67 sm á hæð. Magar gerði sér mat úr metinu og kom víða um heim opinberlega fram.