Þessi api á Indlandi verður að sætta sig við banana. Reuters

Starfsmenn Karagandí-dýragarðsins í Kasakstan hafa brugðið á það ráð að gefa öpum í garðinum rauðvín svo þeir haldi heilsu í kuldakastinu sem gengur yfir landið.

„Við gefum öpunum vín því það veitir þeim vörn gegn sýkingum í öndunarfærum yfir vetrartímann. Það má segja að við rennbleytum þá í víni svo þeir fái ekki flensu,“ segir Svetlana Piljuk hjá dýragarðinum.

„Þegar öllu er á botninn hvolft eru prímatar alveg eins og mannfólk. Þeir njóta þess að drekka áfenga drykki. Þeim líkar það. Sumir misnota það jafnvel, og koma nokkrum sinnum að drykkjardallinum,“ bætir hún við.

Hún tekur fram að apar sem eigi von á afkvæmi megi ekki drekka vín og það sama eigi við um yngstu apana.

Svo að vínið verði girnilegra í augum apanna er söxuðum ávöxtum, hunangi, sítrónu, sykri og heitu vatni blandað í það.

Gríðarlega kalt er í Karagandí í dag, eða um 33 stiga frost.