Emilía og Unnur hafa æft saman frá 10 ára aldri. Golli

Emilía Benedikta og Unnur Elísabet lentu saman í 3. sæti í Dans dans dans í lok síðasta árs. Þær standa nú í ströngu með Íslenska dansflokknum sem frumsýnir verkið Minus 16 laugardaginn 4. febrúar.

Hvers vegna ákváðuð þið að keppa í Dans dans dans? Við ákváðum að keppa til að styðja danslistina á Íslandi. Við vorum ótrúlega ánægðar með hvað þetta sýndi vel hvað það er mikið af sterkum dönsurum á Íslandi. Þetta sýndi Íslendingum hvað við eigum mikið af flottum dönsurum.

Eruð þið ýkt svekktar að hafa ekki unnið milljónina sem var í verðlaunafé fyrir fyrsta sætið? Við erum brjálaðar (hlær). Nei nei, það var ekki markmiðið með þessu heldur frekar að taka þátt í því að búa til þátt. Þetta fékk frábært áhorf og við erum ótrúlega ánægðar með að hafa átt hlut í þessu.

Hvernig er það að dansa með flokknum samanborið við það að dansa í þáttunum? Það er alveg tvennt ólíkt. Við vorum mjög stressaðar í þáttunum að vera að dansa með myndavélar alveg ofan í okkur og líka það að standa fyrir framan dómnefnd og láta dæma sig. Með dansflokknum dönsum við bara á sýningu og svo fer fólk bara heim til sín og ræðir sýninguna sín á milli þar.

Hvernig verður maður dansari í Íslenska dansflokknum? Það er mun erfiðara að komast að í dansflokknum heldur en til dæmis fyrir leikara að komast að hjá leikhúsunum af því að það er svo fátt um laus pláss. Dansarar fara í prufur hjá flokknum og það hafa til dæmis verið haldnar slíkar prufur erlendis inn í Íslenska dansflokkinn og þá sækir oft hellingur af útlenskum dönsurum um stöðu. Núna voru til dæmis að koma tveir erlendir dansarar að dansa með okkur í þessari sýningu.

Meira í Monitor. Blaðið má lesa í rafrænni útgáfu hér.