Lady Gaga. mbl.is/Cover Media

Lady Gaga leitar í jóga til að koma á jafnvægi í lífi sínu og finna innri frið. Söngkonan litríka valdi Bikram-jóga og er að sögn kennara hennar með einstaka hæfileika sem hún notfærir sér í þeim tilgangi að bæta umheiminn. Hún eigi auðvelt með að gefa af sér og færa öðrum gleði, þökk sé jógafræðunum.

Jógakennarinn, Tricia Donegan, segir  í viðtali við New York Times að Lady Gaga sé einstakur nemandi. Hún sé afar gefandi og með tónlist sinni nái hún til fjöldans. Söngkonan noti hæfileika sína til að láta gott af sér leiða og styðjist við jógafræðin í öllu sínu lífi.

Donegan segir Lady Gaga vera mikla lyftistöng fyrir jóga og varpa ljósi á mikilvægi þess að tileinka sér hina fornu speki, bæði í andlegum og líkamlegum skilningi.