Hin goðsagnakennda rokkhljómsveit Van Halen, með David Lee Roth við hljóðnemann, hyggur á hljómleikaferðalag um Bandaríkin á árinu. Þeir gáfu háttsettum innan tónlistargeirans forsmekkinn af því sem koma skal í Los Angeles á dögunum.

Fyrstu hljómleikar Van Halen fara fram 18. febrúar nk. en að auki hyggst sveitin gefa út sína fyrstu hljómskífu síðan platan 1984 kom út.

Af öðrum fréttum úr heimi fræga fólksins má nefna, að Stjórinn sjálfur, Bruce Springsteen, kemur fram á Grammy-verðlaunahátíðinni síðar í þessum mánuði ásamt hljómsveit sinni E Street Band. Springsteen bætist þar með í hóp Adele, Coldplay, Pauls McCartneys og Rihönnu svo aðeins fáir séu nefndir.