Ben Gazzara. Reuters

Bandaríski leikarinn Ben Gazzara er látinn, 81 árs að aldri. Gazzara lést á sjúkrahúsi á Manhattan í New York en hann þjáðist af krabbameini í brisi.

Gazzara lék bæði á sviði og í kvikmyndum og var þekktur  fyrir að leika harðsvíraða glæpamenn, m.a. í myndinni Anatomy of a Murder árið 1959, og Capone árið 1975 þar sem hann lék Al Capone. Hann lék einnig í myndinni The Big Lebowski, sem Cohenbræður gerðu árið 1998. 

Gazzara fæddist árið 1930 en hann var sonur ítalskra innflytjenda. Hann hóf snemma að leika á sviði og árið 1955 lék hann í fyrstu uppfærslunni á leikritinu Cat on a Hot Tin Roof eftir Tennessee Williams.

Gazzara var þríkvæntur en eftirlifandi eiginkonu sinni, Elke Krivatand, kvæntist hann árið 1982.