Heidi Klum og Seal á meðan lífið lék við þau. Reuters

Heidi Klum hefur verið þögul sem gröfin varðandi endalok hjónabands hennar og Seals og ekkert viljað láta hafa eftir sér í fjölmiðlum um málið. Hún hefur þó opnað sig við vini sína og sagt að brestir hafi komið í hjónabandið fyrir um ári.

Samkvæmt heimildamanni tímaritsins Look höfðu Klum og Seal átt við erfiðleika að stríða í hjónabandinu um alllanga hríð en fjara tók undan þeim í byrjun síðasta árs. Bæði eru að sögn miður sín yfir skilnaðinum en Klum hefur sagt vinum sínum að hann hafi ekki verið umflúinn. Seal hafi verið mjög erfiður í skapi og sveiflast á milli þess að vera ofsakátur og mjög reiður.

Haft er eftir heimildamanni blaðsins að Seal sé með mjög erfitt skap og reiðist oft. Hann geti verið ótrúlega skemmtilegur en hafi þann galla að æsa sig út af smámunum og margt komi honum úr jafnvægi. Skapofsi söngvarans hafi reynt mjög á Klum og hún hafi ekki haldið hjónabandið út lengur.