Svona mun turn Fríkirkjunnar í Reykjavík líta út á Vetrarhátíð.

Á Vetrarhátíð í ár, dagana 9.-12 febrúar, munu hvítar ljósglærur streyma úr turni Fríkirkjunnar í Reykjavík. Fyrir ofan vegfarendur verður til sívalur viti ljóss. Innsetning mun lýsa vegfarendum dag og nótt í þrjá daga. Verkið er eftir Ragnheiði Hörpu Leifsdóttur, en hún hefur nýlokið námi við Listaháskóla Íslands. Ljósameistari verksins er Jóhann Pálmi Bjarnason.

 Turnar hafa ávallt heillað Ragnheiði, segir í fréttatilkynningu. Það er eitthvað heillandi við turna, ævintýralegt, dularfullt og sérstakt, segir hún. 

„Vitar veita skipverjum á hafinu von í óveðri, en um leið standa þeir einsamlir og einangraðir. Í sögubókum bíður prinsessan í vita eftir hugrakka prinsinum til að bjarga henni. Þegar við keyrum eftir Borgartúni sjáum við tóman turn úr stáli og gleri, sem minnir okkur á hugsunarhátt nýliðins tíma. En horfum við nokkurn tímann upp á þá turna sem gnæfa yfir okkur í hversdeginum?“

 Nafnið á verkinu er dregið af turni sem byggður var í Alexandríu í Egyptalandi á tímum Rómaveldis. Hlutverk turnsins var að lýsa sjómönnum veginn heim í myrkri næturinnar.