Eyrarrósin er veitt í áttunda sinn í ár mbl.is

Tilkynnt hefur verið um þau þrjú verkefni sem eru tilnefnd til Eyrarrósarinnar árið 2012. Eyrarrósin er sérstök viðurkenning sem veitt er framúrskarandi menningarverkefnum á landsbyggðinni. Þetta er í áttunda sinn sem Eyrarrósin er veitt og mun athöfnin fara fram á Bessastöðum hinn 18. febrúar næstkomandi.

Verkefnin sem eru tilnefnd eru Safnasafnið - Alþýðulistasafn Íslands, Sjóræningjahúsið á Vatneyri og tónlistarhátíðin Við Djúpið en þessi verkefni voru tilnefnd úr methópi umsækjenda. Handhafi Eyrarrósarinnar fyrir árið 2011 er Sumartónleikar í Skálholtskirkju.

Eyrarrósin er samstarfsverkefni Listahátíðar í Reykjavík, Byggðastofnunar og Flugfélags Íslands en markmið verðlaunanna er að stuðla að fjölbreyttum menningarviðburðum og listalífi á landsbyggðinni.

Dorrit Moussaieff forsetafrú er verndari Eyrarrósarinnar og mun afhenda verðlaunin. Það verkefni sem hlýtur viðurkenninguna fær 1,5 milljónir króna, verðlaunagrip eftir myndhöggvarann Steinunni Þórarinsdóttur og flugferðir frá Flugfélagi Íslands.