Antoni Tápies látinn
Spænski listamaðurinn Antoni Tápies Af vef Wikipedia
Spænski listamaðurinn Antoni Tápies lést í Barcelona í gærkvöldi, 88 ára að aldri. Tápies var einn þekktasti samtímalistamaður í Evrópu.
Samkvæmt fréttum spænskra fjölmiðla hafði Tápies verið veikur í talsverðan tíma.
Tápies var meðal annars valinn besti listamaður tuttugustu aldarinnar af spænska dagblaðinu El Mundo en verk Tápies eru þekkt um allan heim. Meðal listamanna sem hann var í miklu sambandi við í upphafi ferils síns eru Joan Miro og Salvador Dali sem einnig voru frá Katalóníu.
Tápies er einn þeirra fjölmörgu sem börðust gegn ofríki Franciscos Francos einræðisherra og sat meðal annars í fangelsi fyrir skoðanir sínar. Árið 2010 var hann heiðraður af Jóhanni Karli Spánarkonungi fyrir störf sín.
