Bandaríska poppsöngkonan Madonna ætlar að fara í hljómleikaferðalag um heiminn en það mun hefjast í Tel Aviv í Ísrael í maí. Þetta segir skipuleggjandi tónleikaferðalagsins. Madonna mun gera víðreist í Evrópu og í Bandaríkjunum áður en hún heimsækir Ástralíu í fyrsta sinn í 20 ár.

Madonna þótti standa sig vel þegar hún skemmti áhorfendum í hálfleik í úrslitaleiknum um bandarísku Ofurskálina, sem fram fór á sunnudag. Þar kom hún fram með rapparanum M.I.A sem olli miklu fjaðrafoki þegar hún sendi áhorfendunum löngutöngina.

Live Nation Entertainment, sem skipuleggur tónleikaferðalagið, segir að Madonna standi fyrir meiriháttar skemmtun og að öllum sé boðið. Hljómleikaferðalagið hefjist 29. maí í Tel Aviv. Þetta er í níunda sinn sem Madonna fer í tónleikaferðalag um heiminn.

Síðasta ferðalag hennar umhverfis hnöttinn hófst árið 2008 og lauk 2009, en það tónleikaferðlag nefndist „Sticky and Sweet“ og þótti ganga mjög vel. Að þessu sinni mun Madonna fylgja eftir nýjstu breiðskífu sinni sem nefnist MDNA og er væntanleg í mars.

Madonna, sem er 53 ára gömul, hefur verið kölluð poppdrottning og ekki að ástæðulausu. Hún hefur selt rúmlega 300 milljónir platna og unnið sjö Grammy-verðlaun á ferlinum, sem spannar rúma þrjá áratugi.