Verk Taylor fóru á 2,7 milljarða
Verk Elísabetar Taylor eftir Vincent Van Gogh var slegið á tæpa tvo milljarða króna. Reuters
Þrjú listaverk úr safni leikkonunnar Elizabeth Taylor voru boðin upp hjá uppboðshúsinu Christie's í dag. Fóru verkin á um samtals 14 milljónir punda eða rúmlega 2,7 milljarða íslenskra króna.
Uppboðshaldarar segja að eitt verkanna, „Vue de l'asile de la Chapelle de Remy“ eftir Vincent van Gogh hafi verið slegið á tæpa tvo milljarða króna. Verkið hafði leikkonan hangandi á stofuvegg á heimili sínu í Bel Air. Þá seldust einnig verk úr safni Taylor eftir Edgar Degas og Camille Pissarro.
Stjórnarformaður uppboðshússins segir verkin þrjú djásnin í krúnu listaverkasafns leikkonunnar.
Elizabeth Taylor lést í mars á síðasta ári, 79 ára að aldri.
Skartgripir og föt leikkonunnar Elísabetar Taylor voru boðin upp í desember. Reuteres
