Foreldrar drengsins neyddu hann tll að hlaupa um hálfnakinn í snjónum og töldu það herða hann. www.mbl.is

Upptaka sem sýnir fjögurra ára gamlan kínverskan dreng, sem neyddur var af foreldrum sínum til að hlaupa nakinn um snævi þakta götu í New York hefur vakið hörð viðbrögð. Nístingskuldi var þegar upptakan var gerð.

Drengurinn er sýndur hlaupa í gegnum snjóskafla til föður síns, sem heldur á myndatökuvélinni. Barnið er eingöngu klætt í skó og nærbuxur, það grætur sárt og sárbiður föður sinn um að taka sig í fangið.

Foreldrarnir heyrast nokkrum sinnum segja drengnum að leggjast niður í snjóinn og hann lætur að lokum undan.

Tilgangur athæfisins mun hafa verið að „herða piltinn“ og gera hann sterkan og heilbrigðan. Hann mun hafa fæðst fyrir tímann og vera fremur heilsuveill.

Þetta þykir minna um margt á umræðu um kínverska uppeldishætti, sem nokkuð hafa verið ræddir vestanhafs, sér í lagi eftir útkomu bókarinnar „Tiger Mother“ eftir Amy Chua, þar sem ströngu kínversku uppeldi er lýst.

Fólkið, sem kemur frá borginni Nanjing í austurhluta Kína, var í fríi í Bandaríkjunum þegar upptakan var gerð.

Reglur um að mega einungis eiga eitt barn hafa gert það að verkum að nú er til kynslóð kínverskra einkabarna sem eru spillt og dekruð. En á sama tíma eru oft á tíðum gerðar óhóflegar kröfur til barnanna um að þau standi sig vel í námi og tómstundum.