Eftirlitsmyndavélar geta verið gagnlegar. mbl.is/Ásdís

Breska lögreglan notast mikið við eftirlitsmyndavélar við störf sín. Á dögunum varð lögreglumaður sem var að fylgjast með skjánum var við grunsamlegan mann. Lögreglumaðurinn hafði samband við lögreglumann sem var nálægur og bað hann um að svipast um eftir grunsamlega manninum. Leitin tók enda eftir um 20 mínútur þegar lögreglumaðurinn áttaði sig á að hann var að leita að sjálfum sér.

Lögreglumaðurinn sem leitaði að „grunsamlega manninum“ var borgaralega klæddur. Lögreglumaðurinn sem fylgdist með eftirlitsmyndavélunum var nýr í starfi og tók starf sitt alvarlega. Hann brást því strax við þegar hann kom auga á mann sem hagaði sér grunsamlega.

Lögreglumaðurinn sem leitaði að sjálfum sér mun hafa skellt upp úr þegar hann áttaði sig á hvað hann hafði verið að gera í 20 mínútur.