Ellen DeGeneres lætur fordóma annarra ekki setja sig út af laginu. AP

Ellen DeGeneres svarar fullum hálsi samtökum íhaldssamra mæðra í Bandaríkjunum, sem segja hana óhæfa í hlutverk talsmanns verslunarrisans JC Penney sökum þess að hún er samkynhneigð. Samtökin, sem kalla sig One Million Moms, hafa hrundið af stað mikilli áróðursherferð þar sem þau hvetja fyrirtækið til að hætta við samstarfið við DeGeneres og velja sér heppilegri fulltrúa.

DeGeneres skrifaði nýlega undir samning við fataverslunarkeðjuna JC Penney um að gerast talsmaður fyrirtækisins. Ákvörðunin hefur mælst afar illa fyrir hjá hinum íhaldssömu kvennasamtökum sem finnst hún óhæf til starfsins vegna kynhneigðar hennar og fullyrða í yfirlýsingu að fólk muni sniðganga verslunina í stórum stíl verði DeGeneres áfram innanborðs.

Hún hefur nú snúist til varnar og í spjallþætti sínum á þriðjudag fordæmdi DeGeneres fordómafullt viðhorf samtakanna. „Eins og margir vita er ég gengin til liðs við JC Penney og er stolt af því,“ sagði hún. „Aftur á móti eru samtök kölluð One Million Moms sem eru ekki eins sátt. Ég aðhyllist heiðarleika, manngæsku og jafnræði og hef að leiðarljósi að koma fram við aðra eins og ég kýs að þeir komi fram við mig.“