Trúlofunarhringur brúðarinnar er nú í höndum kóna. mbl.is/Golli

Nýgift bresk hjón sem ætluðu í brúðkaupsferð til Íslands, voru rænd og þurfa að nota peningana sem voru eyrnamerktir ferðinni í að bæta öryggi á heimili sínu. Ránið átti sér stað á brúðkaupsnóttina og var m.a. trúlofunarhring brúðarinnar og vegabréfi brúðgumans stolið. Til stóð að eyða hveitibrauðdögunum á Íslandi en nú eru þau áform í uppnámi.

Parið yfirgaf heimili sitt síðdegis föstudaginn 3. febrúar til að láta pússa sig saman á Rogerthorpe Manor hótelinu í Pontefract í Vestur-Jórvíkurskíri.

Eftir að hafa játast hvort öðru í vitna viðurvist snéru þau heim á laugardagsmorgninum og komust þá að því að brotist hafði verið inn og verðmætum stolið.

Meðal þess sem var stolið var trúlofunarhringur brúðarinnar og vegabréf brúðgumans. Draumafríið til Íslands verður því að bíða.

„Við erum algjörlega eyðilögð,“ segir brúðguminn Ian Morris. „Búið er að spilla minningum okkar frá brúðkaupinu með innbroti.“

Dóttir hjónanna er mjög hrædd um að þjófarnir komi aftur.