Átta þúsund á franskri hátíð
Leikararnir Jean Dujardin og Berenice Bejo í The Artist Reuters
Franskri kvikmyndahátíð lýkur formlega í dag en tæplega átta þúsund manns hafa nú þegar sótt myndirnar á hátíðinni.
Alls hafa um fimm þúsund manns séð kvikmyndina The Artist og er Stríðsyfirlýsing númer tvö með tæplega eitt þúsund manns og hinar átta myndirnar eru nokkuð jafnar.
„Ekkert lát hefur verið á aðsókninni síðustu daga og er greinilegt að fjölmargar myndir á hátíðinni eiga ennþá heilmikið inni. Hefur því verið brugðið á það ráð að sýna myndirnar á hátíðinni áfram, annars vegar í Háskólabíói og hins vegar í Bíó Paradís,“ segir á vef Græna ljóssins sem stóð fyrir hátíðinni.
The Artist verður sýnd áfram í Háskólabíói en hinar myndirnar verða sýndar áfram í a.m.k. eina viku í Bíó Paradís. Hátíðin flyst svo til Akureyrar í Borgarbíó, laugardaginn 18. febrúar.
