Maðurinn var með 120 grömm af kókaíni innvortis. Reuters

Bandarískur fíkniefnasali sem lögregla í Jacksonwille, í Flórídaríki, hafði afskipti af á dögunum reyndi að flýja undan laganna vörðum. Það væri ekki í frásögur færandi nema fyrir þær sakir að maðurinn sem er á þrítugsaldri er einfættur.

Lögreglumenn stöðvuðu bifreið sem fíkniefnasalinn einfætti var farþegi í. Þegar lögreglumenn gengu að bifreiðinni til að ná tali af ökumanninum steig maðurinn út farþegamegin og hoppaði á einum fæti burtu.

Maðurinn gafst fljótt upp á flóttanum og sneri aftur á vettvang þegar lögregla skipaði honum að koma. Í bílnum fannst poki af maríjúana og við leit á lögreglustöð kom í ljós að maðurinn var með 120 grömm af kókaíni innvortis.