Leikkonan Naomi Watts mun leika Díönu prinsessu í nýrri kvikmynd sem er sögð fjalla um ástarsamband hennar við hjartaskurðlækninn Hasnat Khan.

Fram kemur á vef breska útvarpsins að þau hafi átt í leynilegu ástarsambandi sem hófst árið 1995 og lauk skömmu áður en hún lést í ágúst árið 1997.

Oliver Hirschbiegel leikstýrir myndinni sem heitir Caught in Flight.

Watts segir að það sé heiður að fá að leika Díönu. „Díana prinsessa var elskuð um allan heim, og ég hlakka til að mæta þeirri áskorun að leika hana á hvíta tjaldinu,“ segir leikkonan.

Hirschbiegel hefur m.a. leikstýrt kvikmyndinni Der Untergang frá árinu 2004. Hún fjallar um síðustu daga nasistaleiðtogans Adolfs Hitlers. Hann segir að Watts sé einstök leikkona og kjörin í hlutverkið.