Robert Dewey Hoskins. AP

Lögreglan í Los Angeles handtók í dag mann sem strauk af geðsjúkrahúsi  í síðustu viku og er dæmdur fyrir að hafa í hótunum við söngkonuna Madonnu.

Robert Dewey Hoskins var dæmdur í 10 ára fangelsi árið 1996. Hann dvaldi um tíma á öðru sjúkrahúsi eftir að hann losnaði úr betrunarvistinni. Í júlí í fyrra var hann handtekinn og vistaður á geðsjúkrahúsi í Norwalk. Hann náði að strjúka þaðan í síðustu viku.

Madonna sagði við réttarhöldin árið 1996 að hún hefði haft martraðir eftir að hún sá hann nærri heimili sínu árið 1995.

Lífvörður söngkonunnar sagði við hana að Hoskins hefði haldið því fram að Madonna ætti að vera eiginkonan sín. Ef hún vildi það ekki hótaði hann að skera hana á háls.

Síðar á árinu 1995 klifraði Hoskins yfir vegg við heimili Madonnu í Hollywood Hills og stökk ofan í sundlaugina hennar. Atvikið endaði með því að öryggisvörður særði Hoskins með því að skjóta hann tvisvar. Madonna var stödd í Flórída þegar þetta gerðist.

Madonna varpar eflaust öndinni léttar. Reuters