Simon Cowell. LUKE MACGREGOR

Simon Cowell er fallinn fyrir Carmen Electra en hann staðfesti nýlega að hann væri hættur með Mezghan Hussainy, að minnsta kosti í bili. Cowell fékk Baywatch-stjörnuna til að hlaupa í skarðið sem dómari í hæfileikaþættinum Britain's Got Talent fyrir Amöndu Holden sem eignaðist sitt annað barn í síðustu viku. Electra hefur fengið blendnar viðtökur meðal áhorfenda en Cowell er yfir sig hrifinn af nýju samstarfskonunni og getur ekki haft hendurnar af henni á meðan upptökum stendur.

Samkvæmt heimildamanni breska dagblaðsins Sun kom valið á nýja dómaranum fólki mjög á óvart en þegar hún birtist varð öllum fljótt ljóst af hverju hún var ráðin. Voru þau Cowell nánast óaðskiljanleg við upptökur á þriðjudag, létu vel hvort að öðru og hegðuðu sér eins og táningar. Þótti viðstöddum að sögn neyðarlegt að horfa upp á látalætin. Cowell dró ekki dul á aðdáun sína á sjónvarpsstjörnunni og skrifaði á Twitter að loknum vinnudegi: Carmen er ofsalega sæt.

Carmen Electra er hrifin af myndavélum. AP