Tommy Jordan í myndbandinu. Skjáskot/Youtube

Myndband af bandarískum karlmanni sem refsar unglingsdóttur sinni með því að skjóta af skammbyssu á fartölvu hennar hefur vakið hörð viðbrögð á netinu og yfir tvær milljónir manna skoðað það á Youtube. Refsingin var tilkomin vegna færslu stúlkunnar á Facebook, þar sem hún kvartar yfir foreldrum sínum.

Maðurinn, Tommy Jordan, skýrir í myndbandinu að hann hafi verið ósáttur við færslu stúlkunnar, sem er fimmtán ára, og segir að refsingin sé til að kenna henni, og vinum hennar, lexíu.

Eftir að hafa skotið á fartölvuna segir Jordan: „Þú getur fengið nýja tölvu þegar þú kaupir þér nýja tölvu. Ég vona að þú hafir haft ánægju af tiltæki þínu á Facebook.“

Yfir fjörutíu þúsund manns hafa skrifað ummæli við myndbandið og sitt sýnist hverjum um uppeldisaðferðir Jordans. Sjón er sögu ríkari og má sjá myndbandið hér að neðan.