Lagerfeld biðst afsökunar
Karl Lagerfeld er umdeildur maður. Getty Images
Þýski tískuhönnuðurinn Karl Lagerfeld hefur beðið afsökunar á ummælum sínum um söngkonuna Adele, en hann sagði hann vera of feita. „Ég vil segja við Adele að ég er stærsti aðdáandi hennar,“ sagði Lagerfeld, sem mun iðrast sáran.
„Stundum, þegar ein setning er tekin út úr viðtali, þá breytist merking hennar,“ bætti hann við.
Lagerfeld sagði í viðtali við breska blaðið Metro að hann vissi hvernig það væri að vera of þungur og vera undir stöðugri pressu fjölmiðla. „Ég grennti mig um 30 kíló fyrir tíu árum síðan og hef ekki bætt því á mig aftur,“ sagði tískukóngurinn granni.
„Adele er fögur stúlka. Hún er sú allra besta og ég get ekki beðið eftir næstu plötu hennar.“
Þetta er ekki í fyrsta skipti sem ummæli Lagerfelds um holdafar hafa vakið umtal. Eitt sinn sagði hann að öllum væri sama um horaðar fyrirsætur nema „feitum mömmum með kartöfluflögupoka í fanginu“.
