Þegar allt lék í lyndi á Grammy-verðlaununum fyrir ári. DANNY MOLOSHOK

Katy Perry og Russell Brand komust nýlega að samkomulagi um forræðið yfir kettinum þeirra.

Stjörnurnar tvær standa í skilnaði eftir 14 mánaða hjónaband og undirrituðu pappíra þess efnis þann 8. febrúar. Áður en þeir voru undirritaðir áttu þau fund þar sem þau ræddu hinar ýmsu hliðar skilnaðarins á nýju heimili Russells í Hollywood Hills.

„Hún fékk köttinn sem þau áttu saman og hann var sammála um að hún ætti að hafa forræði yfir honum,“ sagði heimildarmaður við tímaritið Grazia. „Katy var skiljanlega gráti næst á fundinum. Hún faðmaði Russell innilega og óskaði honum góðs gengis með allt. Hún reyndi að sýna stillingu en brast í grát um leið og hún settist upp í bíl og grét úr sér hjartað.“ Kötturinn ber nafnið Krusty en Russell á einnig annan kött sem ber nafnið Morrissey.

Heimildir herma að Katy hafi jafnframt nýtt tækifærið til að skila skartgripum sem hún fékk að gjöf frá Russell. „Þetta var frekar stuttur fundur. Hún skilaði giftingarhringnum, sagði að hún gæti ekki horft á hann og vildi að hann tæki hann,“ bætti heimildarmaðurinn við. „Katy var alveg sama hvað hann kostaði, hún varð að losna við hann og Russell getur gert það sem honum sýnist við hann.“