Franska lögreglan rannsakar nú stuld á hálsól hunds sem stolið var í dýrakirkjugarði í úthverfi Parísarborgar. Hálsólin, sem var grafin með hundinum, var alsett demöntum og er metin á 9 þúsund evrur, 1,5 milljónir króna.

Er talið að hálsólinni hafi verið stolið aðfaranótt 5. febrúar sl. Hundurinn, Tipsy, var í eigu eiginkonu bandarísks iðnjöfurs og var grafinn í dýrakirkjugarði í Asnieres-sur-Seine árið 2003. Samkvæmt upplýsingum frá lögreglu er legsteinn hvutta úr marmara og á honum mynd af svörtum kjölturakka og rautt hjarta.

Bæjarstjórinn í Asnieres, Sebastien Pietrasanta, segir að það hafi komið sér á óvart hversu verðmæt ól hafi verið grafin með hundinum og segir að slíkar gersemar sé ekki að finna í öllum gröfum hunda og katta í kirkjugarðinum en alls eru um 3 þúsund dýr grafin þar. Auk hunda og katta eru grafnir apar, kindur, hross, kanínur og jafnvel ljón. Eitt þekktasta dýrið sem hvílir í garðinum er hundurinn Rin Tin Tin sem kom fram í meira en 20 Hollywood-kvikmyndum á þriðja áratug síðustu aldar.