Banderas og Griffith eiga sér flókið en einfalt leyndarmál. DANNY MOLOSHOK

Antonio Banderas er sáttur við að hafa skilið við allt rómanska elskhugakjaftæðið.

Spænski leikarinn er hvað frægastur fyrir sjarma sinn og útlit ásamt því að hafa leikið ýmsar karlhetjur í myndum á borð við Evita og The Mask of Zorro. Nú er leikarinn orðinn 51 árs og segir hann það mikinn létti að hafa loks hrist af sér stimpilinn sem fékkst af hlutverkunum sem hann hefur farið með í gegnum tíðina.

„Ég get loksins komist undan þessu kjaftæði í sambandi við að leika rómanska elskhuga í sífellu,“ segir hann í viðtali við dagblaðið The Times.

Antonio kvæntist leikkonunni Melanie Griffith árið 1996 og útskýrir leyndarmálið á bak við farsælt hjónaband þeirra í viðtalinu. „Leyndarmálið okkar er eins flókið og það er einfalt: við elskum hvort annað. Við erum komin af skeiðinu þar sem við erum blinduð af ást, héldum okkur á braut ástarinnar í gegnum erfiða tíma og nú hefur okkur tekist að komast á skeið þar sem við verðum aftur ástfangin hvort af öðru trekk í trekk,“ segir Banderas.