Gemma Tevendale ásamt eiginmanni og börnum. Mynd/The Sun

Stúlkubarn sem fæddist í Bretlandi fyrir þremur vikum er talið vera þyngsta barn sem fæðst hefur þar í landi en stúlkan vó rétt tæp 5,8 kíló. Að auki kom hún í heiminn með tvær heilbrigðar tennur.

Það tók móður stúlkunnar, Gemmu Tevendale, um 44 mínútur að fæða barnið og kemur fram í breskum fjölmiðlum að fæðingin hafi gengið vel fyrir sig.

Ekki er vitað dæmi um viðlíka stærð á nýfæddu barni í Bretlandi en sjálf segist móðirin halda að hollt mataræði á meðgöngu, einkum túnfiskur og reyktur lax þrisvar sinnum í viku, hafi aukið vöxt barnsins.

Stúlkan, sem er þriðja barn Tevendale, hefur mikla matarlyst og drekkur hún bæði af pela og brjósti.