Emúar geta ekki flogið og eru ekki sérstaklega góð gæludýr. Af vef Wikipedia

Emúi gengur laus í Vermont í Bandaríkjunum. Fuglinn slapp af sveitabýli fyrir fimm vikum en hann þykir sérlega bragðvís og viðskotaillur. Síðast sást til hans á föstudaginn er hann gekk í rólegheitum fram hjá skrifstofu skólastjórans í smábænum South Hero.

Emúinn, sem er líkur strúti en þó nokkru minni, er um 68 kíló af þyngd og getur ekki flogið. Þótt emúinn eigi það til að gera sig líklegan til að skeyta skapi sínu á fólki hafa íbúar í bæjunum á því svæði sem hann gengur laus á gaman af honum.

Eigandi emúans segist hafa keypt þrjá slíka handa barnabörnunum. Hann segir þá ekki góð gæludýr.

Í auglýsingu eigandans í bæjarblaðinu segir: „Emúi gengur laus. Þú mátt eiga hann ef þú nærð honum.“