Heidi Klum virðist ákveðin í að skilja við eiginmann sinn til sjö ára, tónlistarmanninn Seal. Parið tilkynnti um endalok hjónabandsins í síðasta mánuði en hvorugt hefur enn sótt um skilnað. Seal sagðist ætla að ganga áfram með giftingarhringinn en hefur nú tekið hann niður og virðist stefna í að þau stígi skrefið til fulls og óski eftir að hjónaband þeirra verði leyst upp.

Klum og Seal voru aðskilin á Valentínusardag í fyrsta sinn í mörg ár. Klum og börnin fjögur eyddu deginum í Los Angeles með vinum en Seal er staddur í Ástralíu við upptökur á hæfileikaþættinum Voice. Samkvæmt heimildamanni tímaritsins People var bjart yfir Klum sem virtist njóta þess að vera ein með börnunum og með fyrrverandi eiginmanninn víðsfjarri.

Seal og Klum búa enn undir sama þaki á heimili sínu í Los Angeles en halda samskiptunum að sögn í algjöru lágmarki. Finnst Klum auðveldara að hafa þann háttinn á, það minnki álagið og spennuna og auðveldi henni að taka næstu skref.