Jessica Biel og Justin Timberlake hófu aftur samband á síðasta ári eftir stutt hlé og um jólin bárust þær fregnir að Timberlake hefði farið á hnén og borið upp bónorðið. Trúlofunin fékkst ekki staðfest og ekkert bólaði á hring á hendi unnustunnar, fyrr en nú.

Biel og Timberlake mættu saman til mikillar veislu í New York á laugardagskvöld þar sem haldið var upp á velgengni hins geysivinsæla sjónvarpsþáttar Saturday Night Live. Ekki fór framhjá viðstöddum að Biel skartaði dýrindis trúlofunarhring og var leikkonan Kristen Bell í hópi þeirra sem véku sér að Biel og dáðust að nýja djásninu, að því er haft er eftir heimildamanni tímaritsins People.

Leikaraparið hóf ástarsamband árið 2007 eftir að Timberlake batt enda á samband sitt og leikkonunnar Cameron Diaz. Þau hættu saman í stuttan tíma á síðasta ári en tóku svo aftur upp þráðinn þar sem frá var horfið og bar Timberlake að sögn upp bónorðið í fríi í Wyoming skömmu fyrir jól.