Adam Levine, söngvari hljómsveitarinn Maroon 5 og dómari í hæfileikaþættinum The Voice, fer ekki leynt með það að hann og kærastan, Victoria´s Secret-fyrirsætan Anne Vyalitsyna nota engar getnaðarvarnir.

Levine var gestur í útvarpsþætti Howards Stern sem hafði lítið fyrir því að fá söngvarann til að opna sig um ástamálin. Stern spurði Levine hvaða aðferðum hann og Vyalitsyna beittu til að koma í veg fyrir að hún yrði ófrísk. Svarið var einfalt, þau nota engar getnaðarvarnir.

Söngvarinn og fyrirsætan hafa verið par í tvö ár en hún er talsvert yngri en hann eða 25 ára. Deildi Levine því með útvarpshlustendum að sambandið væri það  lengsta sem hann hefði verið í um ævina og hann hefði ekki í hyggju að klúðra því.