Katy Perry varð fyrir miklu áfalli þegar Russell Brand tilkynnti í lok síðasta árs að hann vildi skilja eftir 14 mánaða hjónaband. Perry vinnur nú að gerð nýrrar plötu og finnur huggun og heilun í því að semja angurvær lög um sambandið við fyrrum eiginmanninn.

Söngkonan hefur átt mjög erfitt andlega og er enn mjög miður sín, er haft eftir heimildamanni breska tímaritsins Grazia. „Katy fær útrás með því að semja lög og því hefur vinnan við nýju plötuna reynst henni frábær hjálp til að takast á við vonbrigðin, reiðina og sorgina,“ segir heimildamaður blaðsins.

Perry og Russell undirrituðu skilnaðarpappírana í byrjun febrúar en leikarinn flutti út í desember. Samskipti þeirra voru fyrst í stað á hæfilega vinalegum nótum en síðustu vikur hefur sambandið farið hríðversnandi. Ekki hjálpar til að Brand hefur sést í fylgd dökkhærðrar fegurðardísar, listakonunnar  Orielu Medellin Amieiro, sem hann kynntist í jógatíma.