Einungis tólf manns mættu á frumsýningu á kvikmynd Angelinu Jolie, In the Land of Blood and Honey, í Belgrad í Serbíu í kvöld.

Í myndinni er sögð saga bosnískrar konu sem er múslimi og serbnesks manns. Þau eiga í ástarsambandi áður en stríðið brýst út í Bosníu árið 1992 en upp úr sambandinu slitnar fyrir stríðið. Þau hittast síðan á ný þegar hún er tekin til fanga af herdeild Bosníu-Serba sem fyrrverandi elskhugi hennar stýrir.

Þrátt fyrir orðróm þar að lútandi var myndin ekki bönnuð í Serbíu en viðtökurnar í Belgrad eru aðrar en í Sarajevo í Bosníu í síðustu viku er um fimm þúsund manns mættu í veislu við frumsýningu myndarinnar.

Á serbneska fréttavefnum Mondo kemur fram að hluti þeirra tólf sem mættu hafi gengið út af myndinni.

Haft er eftir Mirko Beokovic, sem situr í kvikmyndaakademíunni í Belgrad, að myndin sé hlutdræg þar sem Bosníu-múslimar eru sýndir sem siðfágað fólk en Serbar látnir líta út eins og villimenn.