Jennifer Aniston hefur eignast sína stjörnu á frægðarstéttinni í Hollywood, Hollywood Walk of Fame. Stjarna leikkonunnar var afhjúpuð við hátíðlega athöfn á miðvikudag fyrir framan West Hollywood-hótelið að viðstöddu fjölmenni. Meðal gesta voru kærastinn, Justin Theroux, og faðir leikkonunnar, John Aniston.

Með stjörnunni er Aniston heiðruð fyrir framlag sitt til sjónvarps- og kvikmyndalistarinnar en hún er einna þekktust fyrir túlkun sína á Rachel Green í gamanþáttaröðinni langlífu Friends.

Í viðtali við Hollywood Reporter kveðst leikkonan ekki sjá fyrir sér að saga vinanna úr sjónvarpsþáttunum vinsælu eigi eftir að rata á hvíta tjaldið. Vinirnir eigi heima í sjónvarpi, heima í stofu hjá fólki, ekki í kvikmyndahúsi.