JK Rowling Reuters

J.K. Rowling, höfundur Harry Potter, er búin að skrifa skáldsögu fyrir fullorðna, sem hún segir að sé mjög ólík fyrri metsölubókum sínum. Útgefendur hennar sögðu frá þessu í dag, og sögðu jafnframt að innan skamms yrði titill bókarinnar og útgáfudagur tilkynntur.

Bókin verður gefin út bæði á prentuðu og rafrænu formi síðar á árinu. „Ég hef virkilega notið þess að skrifa næstu bók mína, en hún verður gjörólík Harry Potter-bókunum,“ sagði Rowling í yfirlýsingu í dag.

Rowling varð tekjuhæsti rithöfundur heims á samningi sínum við Bloomsbury-útgáfufélagið, en hún ákvað að róa á ný mið fyrir „nýtt tímabil á rithöfundarferlinum“ og hefur samið við Little Brown-útgáfuna um nýju bókina. „Velgengni Harrys færði mér frelsi til að prófa mig áfram í nýjar áttir og með því frelsi fannst mér rökrétt framhald að fá mér nýjan útgefanda,“ sagði hún.

Harry Potter-bækurnar hafa selst í yfir 450 milljónum eintaka um allan heim, en sú sjöunda og síðasta í röðinni kom út árið 2007.