Viktoría, krónprinsessa Svía, eignaðist dóttur um klukkan hálf fimm í morgun. Litla stúlkan, sem síðar meir mun sitja á valdastóli í Svíþjóð, fæddist á Karólínska sjúkrahúsinu í Stokkhólmi og var 51 sentímetrar og tæp 3,3 kíló. Faðirinn, Daníel Westling, segir móður og barni heilsast vel.

„Þetta var mikið álag, það getur jú alltaf eitthvað farið úrskeiðis. En þetta gekk vel,“ sagði faðirinn nýbakaði í samtali við vefsíðu sænska dagblaðsins Dagens Nyheter. 

Hann sagði fjölskylduna ætla að taka það rólega á næstunni og bað fjölmiðla um að taka tillit til þess.

Viktoría kom á sjúkrahúsið skömmu fyrir klukkan eitt í nótt í fylgd sænsku öryggislögreglunnar, Säpo. Hún er á einkastofu á sjúkrahúsinu.