Elton John hefur falið Justin Timberlake það vandasama verkefni að túlka hann sjálfan í sjálfsævisögulegri mynd sem tónlistargoðið er með í smíðum í samvinnu við eiginmann sinn, David Furnish. Leitin að rétta leikstjóranum stendur enn yfir en þeir félagar vilja vanda valið og velta málunum vel fyrir sér. Aðalatriðið er að þeirra sögn að finna rétta leikstjórann sem nær til aðalleikarans, Timberlakes, og öfugt.

„Við leitum nú að leikstjóra en það er mikilvægt að hann hafi sömu sýn á myndina og við Elton,“ segir Furnish í samtali við fréttavefinn E! „Justin og  Elton hafa rætt málið vel og lengi og Justin leggur áherslu á góða samvinnu hans og væntanlegs leikstjóra, þeir tveir verði að ná vel saman. Okkur liggur ekkert á, við tökum okkur þann tíma sem þarf til að finna rétta aðilann í verkið.“