Brjóst Janet Jackson fyrir hæstarétt

Átta ár eru liðin síðan Janet Jackson varð miðpunktur mikils hneykslismáls í Bandaríkjunum þegar bert brjóst hennar sást í mynd í beinni útsendingu árið 2004. Ætla mætti að málinu væri löngu lokið og rykið sest en svo er þó ekki, því brjóstamálinu var í dag áfrýjað til hæstaréttar Bandaríkjanna.

Deilur um málið hafa verið háðar fyrir dómstólum allar götur síðan bert brjóstið blasti stundarkorn við sjónvarpsáhorfendum í beinni útsendingu úrslitaleiks ameríska fótboltans, Super Bowl, og gerði allt vitlaust. CBS sjónvarpsstöðin var ákærð fyrir að brjóta reglur um siðgæði í útsendingu og farið fram á sektargreiðslu.

Árið 2006 kvað alríkisnefnd um samskiptatækni úr um að CBS skildi greiða 550.000 dali í sekt. CBS áfrýjaði úrskurðinum og þannig hefur málið þokast áfram innan réttarkerfisins undanfarin ár þar til í dag að því var áfrýjað á hæsta stig. 

Janet Jackson kom fram í hálftíma löngu hléi Super Bowl keppninnar ásamt Justin Timberlake. Í atriðinu reif Timberlake leðurpjötlu framan af brjósti hennar, svo ber geirvartan blasti við í sekúndubrot. Um 90 milljónir manna fylgjast með Super Bowl útsendingunni í Bandaríkjunum árlega.

• 2 blogg um fréttina

Bloggað um fréttina

• Ómar Ragnarsson: "Á parið var púað....Guðsþakkarvert."
• Davíð Þ. Löve: Brjóst fyrir Hæstarétt????