Kakkalakkar með upp á svið

Lady Gaga er með áætlanir um að mæta upp á svið á næstu tónleikum með frumlegt höfuðfat sem geymir lifandi kakkalakka. Söngkonan byggir hugmyndina á rannsókn verkfræðinema í New York sem fundu út að kakkalakkar eru sérlega gefnir fyrir tónlist hennar.

Lady Gaga fékk spurnir af rannsókn verkfræðinema við New York-háskóla sem snerist um hreyfiþörf skordýra. Nemendurnir notuðu kakkalakka við tilraun sína og léku fyrir þá mismunandi tónlist; bæði róleg lög og þungarokk.

Tónlistin hafði engin áhrif á skordýrin þangað til Lady Gaga var sett á fóninn, þá tóku kakkalakkarnir við sér og byrjuðu að dilla sér.

Söngkonan er stórhrifin af niðurstöðum verkfræðinemanna og hefur nú ráðið hönnuð til að útbúa sérstakan höfuðbúnað með lifandi kakkalökkum í, að því er haft er eftir heimildamanni breska blaðsins The Sun.

„Lady Gaga hefur lengi velt því fyrir sér hvernig hún gæti toppað sjálfa sig og kjötkjólinn fræga frá MTV-hátíðinni 2010,“ segir heimildamaður blaðsins. „Kakkalakkahöfuðbúnaðurinn gæti verið málið.“

• Blogga um frétt