Rómarborg hefur ákveðið að heiðra RIFF, Alþjóðlegu kvikmyndahátíðina í Reykjavík, með því að halda kvikmyndahátíð tileinkaða RIFF og Íslandi. Hátíðin fer fram í Róm í síðari hluta október og mun standa í fimm daga.
Um það bil 15 myndir verða í boði á hátíðinni, bæði nýjar og nýlegar íslenskar myndir og úrval af þeim alþjóðlegu kvikmyndum sem sýndar verða á næstu RIFF.
RIFF hátíðin fer nú fram í níunda skipti í Reykjavík dagana 27. september til 7. október. Í tilkynningu frá aðstandendum RIFF segir að hátíðin njóti mikillar virðingar erlendis og boð Rómarborgar sé mikil viðurkenning fyrir hátíðina sem og góð landkynning fyrir Ísland.
Íslenska hátíðin í Róm er haldin fyrir milligöngu Ítalans Giorgio Gosetti, dagskrárstjóra hjá RIFF og stjórnanda Venice Days í Feneyjum. Þrír fulltrúar Rómarborgar eru væntanlegir til Íslands til að upplifa RIFF-hátíðina, undirrita samninga og fleira. Auk þess eru væntanlegir á hátíð fulltrúar stórra sölu og dreifingar fyrirtækja á Ítalíu meðal annars Fandango.