Iceland Airwaves-tónlistarhátíðinni lauk með tónleikum og þrívíddarsýningu þýsku rafhljómsveitarinnar Kraftwerk í Eldborgarsal Hörpu í gærkvöldi.

„Hátíðin hefur gengið alveg frábærlega. Það voru margir flottir viðburðir, frá þeim smæstu til hinna stærstu. Það er örugglega mat hvers og eins hvað var markverðast en það var gaman að upplifa Ólaf Arnalds og Sinfóníuna í Hörpu og Kraftwerk,“ segir Grímur Atlason, framkvæmdastjóri hátíðarinnar.

Um 4.500 útlendingar hafi komið hingað til lands vegna hátíðarinnar. Grímur segir að það sé íslensk tónlist sem kveiki áhugann hjá útlendingum að koma á hátíðina enda séu 156 af rúmlega 200 hljómsveitum sem komu fram íslenskar.

„Það voru margir að fylgjast með nýstirnunum sem vinna Músíktilraunir því það hafa komið út úr þeim bönd sem hafa verið öflug, eins og Of Monsters and Men,“ segir hann.

Lóa Hlín Hjálmtýsdóttir úr hljómsveitinni FM Belfast sem spilaði í Silfurbergi á laugardagskvöld segir að hátíðin í ár hafi verið sú best skipulagða frá bæjardyrum hljómsveitanna séð. „Það eru allir ánægðir og ótrúlega vel að þessu staðið,“ segir hún en þetta var í sjöunda skipti sem hljómsveitin kemur fram á hátíðinni.

Tengdar fréttir

Iceland Airwaves

Gamla Airwaves gjaldþrota

• Davíð tekur auðmjúkur við keflinu af Matta í Hatara
• Steinunn Ólína lét sig ekki vanta
• Íslandsstofa og Iceland Airwaves verða Live from Reykjavík
• Iceland Airwaves frestað til 2021

» Fleiri tengdar fréttir