Bandaríska leikkonan Scarlett Johansson á von á barni með unnusta sínum, Frakkanum Romain Dauriac, samkvæmt fréttum helstu slúðurmiðla. Sex mánuðir eru síðan parið opinberaði trúlofun sína.
Samkvæmt E! News er von á barninu í ágúst og samkvæmt E! hafa fregnirnar fengist staðfestar úr ýmsum áttum. Bendir E! á að Johansson hafi lýst því yfir í viðtölum að hana dreymi um að stofna til fjölskyldu.
„Ég myndi vilja eignast mína eigin fjölskyldu, það væri yndislegt,“ sagði Johansson í viðtali við Daily Mail í desember. „Þeir segja að það sé aldrei rétti tíminn og ég er viss um að það er rétt en ég held að þú verðir að gera ráð fyrir því eins og öðru,“ bætti hún við í viðtalinu.
Í viðtali við Good Morning America nýverið sagðist leikkonan ekki vera á leið í hjónaband og enginn slíkur undirbúningur væri í gangi en hún var áður gift leikaranum Ryan Reynolds.